القمة 133.. أحمد بلال: كنا نقدر نكسب الزمالك 6 وألوم على بن جديدة

وصف الفيديو

ببارك لكل الأهلاوية في كل مكان. تحدي كبير جدا جدا من فرقة النادي الأهلي، من مدرب النادي الأهلي، ومن جمهور النادي الأهلي. قلنا الأسبوع اللي فات يوم الأربعاء إن أنا متفائل وبشكل كبير في مباراة الزمالك. مباراة النهاردة كانت تبدو إن هي مباراة صعبة بكل تأكيد؛ أنت بتلاعب فريق الزمالك، فريق قوي، فريق عنده نجوم كتيرة، فريق بيؤدي بشكل كويس وبطل الدوري الموسم الماضي. بتلاعبهم النهاردة وعندك تحديات كبيرة جدا ما قبل المباراة، كل الناس كانت بتشكك في أداء الأهلي، في قدرات الأهلي، وفي إمكانياته بالفوز، ولكن إحنا هنا في "هنا الأهلي" وحتى مع ضيوفنا كمان كنا بنتكلم عن الأهلي؛ دايما بيبقى حاضر في الموعد، الأهلي دايما بيبقى موجود في التوقيت المظبوط، الأهلي لما تحتاجه بتلاقيه دايما. جمهور الأهلي النهاردة كان موجود في الاستاد، لاعيبة النادي الأهلي النهاردة كانت موجودة في الاستاد بالفعل، الروح القتالية الشوط التاني كانت عالية جدا جدا. الشوط الأول كان شوط مناصفة ما بين الفرقتين، مناصفة يعني الزمالك بيروح شوية والأهلي بيروح شوية، ولكن طبعا في البداية أول 20 دقيقة الأهلي كان مسيطر بشكل كبير. الأهلي من وجهة نظري الشخصية النهاردة، طبعا أنا مش عايز أقلل من المكسب، ولكن الأهلي النهاردة كان يقدر يكسب 4 و5 و6 مستريح، كان ممكن نعمل النهاردة سكور كبير، كان ممكن نخرج بنتيجة كبيرة جدا. بعض التوفيق، بعض الأخطاء، الحاجات الصغيرة دي كان ممكن نروح بالمباراة في حتة تانية خالص. مش بقول كده تقليلا من المنافس بالعكس، منافس فريق كبير وفريق قوي وهو المنافس والغريم التقليدي بتاعنا، ولكن لو كنا استغلينا الفرص اللي سجلناها، وخاصة الفرصة اللي عايز ألوم فيها بن جديدة، فرصة حلوة وجايلك على طبق من ذهب وزيزو عمل فيها مجهود أكتر من رائع، وكان ممكن تحط فيها شمالك وتحط الجول الأول ونبتدي المباراة من بدري بدري قوي والأهداف نسجلها من بدري، خاصة إن فريق الزمالك كان نازل قلقان منك شويتين تلاتة، كان نازل بيلعب دفاع منطقة أو دفاع نص ملعب من بداية اللقاء كان مديك مساحات وأنت قدرت تستغلها، قدرت تروح وقدرت تضغط أول 20 دقيقة وقدرت تعمل عرضية في التانية في تصويبة في التانية لحد ما ربنا سبحانه وتعالى كرمنا وسجلنا الهدف الأول. دي اللقطة بتاعة زيزو اللي أهدرها بن جديدة، وهي لقطة الحقيقة غريبة جدا، ولكن معلش