القمة 133.. تامر أمين: الأهلي في أسوأ حالاته بيكسب الزمالك هو امتى هيكسب

وصف الفيديو

المعسكر الأبيض، بغض النظر عن البطولات. عشان ما حدش يقول لي ما أنتوا كسبتوا السنة اللي فاتت وإحنا اللي خدنا الدوري، أنا مش بتكلم عن بطولات وكذا، بس حتى الزملكاوية من إمبارح وهم عندهم هذا الإحساس أنه في مشكلة عند الزمالك لما يلاعب الأهلي، مشكلة بقى نفسية، مشكلة تكتيكية، مشكلة في التحضير، مشكلة في التوفيق، مشكلة المهم أن في مشكلة. ده مش كلامي ده كلام الزملكاوية حتى بصوا على السوشيال ميديا النهارده كل صفحات الزملكاوية بيضربوا كف بكف اللي هو وبعدين إمتى هنفوز على الأهلي؟ خصوصًا لما يكون الأهلي مش في أحسن حالاته، وده كان وضع الأهلي إمبارح. أنا بقول لكم أنا أهلاوي بامتياز وبقول لكم أن الأهلي إمبارح مش كان مش في أفضل حالاته، يمكن كان في أسوأ حالاته وده اللي يضايق الزملكاوية أكتر، أنه طب الأهلي لما يكون جامد ماشي، لكن لما يكون الأهلي سيء و90% من لعيبته مش في حالتهم وفي أخطاء تكتيكية ودفاعية كثيرة، يبقى إمتى هنكسب؟ ده السؤال اللي بيراود كل الزملكاوية. هنتكلم عن كل شيء يخص القمة لأن أنا عارف أن حضراتكم لسه عايشين أجواءها والسوشيال ميديا مليانة بالتفاعلات سواء الحمراء أو البيضاء، بس أنا هعجل كل الكلام ده بعد 10 دقائق من دلوقتي تقريبًا لما نفتح ملعب آخر النهار وأستضيف الكباتن الكبار الكابتن حمادة عبد اللطيف والكابتن ضياء سيد نجوم منتخب مصر ونادي الزمالك والأهلي في عزهما وهنتكلم عن كل شيء يخص مباراة القمة، التفاصيل، القصة بتاعة الحرب النفسية وكل التاكتيكس والأداء اللي أنتوا شوفتوه إمبارح في مباراة الديربي.