القمة 133.. تحليل فني رضا شحاتة وعادل عبد الرحمن ستوديو الأهلي: أخيرا عموته بيضحك وشوبير رجل المباراة

وصف الفيديو

كابتن رضا شحاته: منصف بكرار سنة أولى قمة بيحرز هدف، وهو هدف الثقة والاطمئنان للنادي الأهلي، ده الهدف اللي قتل المباراة. مهم جدا إنه ياخد ثقة في الوقت ده، ومهم جدا إنه يبقى لسه نازل ويجيب جول في نادي الزمالك، ورد فعل الناس لما يمشي في الشارع هيفرق معاه كتير جدا في التمرين وهيفرق معاه جدا الفترة اللي جاية. مهم جدا في الماتشات الكبيرة إنك ممكن تخلق نجم جديد، والناس تلتف حواليه. أنا بقولك إنه لما يبدأ يمشي في الشارع بعد الهدف، الموضوع بيختلف تماماً عن قبله. الحسين عموته الآن، خلي بالك ده أول أهدافه الرسمية مع النادي الأهلي، فهدف في توقيت مهم. إحنا كأهلي بعد الماتش على طول بتعيش أحلى أسبوع، اللي هو التمرين الأسبوع اللي جاي، ضحك وهزار. شفنا عموته بيضحك دلوقتي، فالأمور دي حاجات نفسية مهمة جدا للاعب في الفترة اللي جاية. أنا بقول إن الماتشات اللي جاية هتبقى للنادي الأهلي مختلفة تماماً معنوياً ونفسياً، وهيبقوا أقوى بكتير من ماتشات بداية الموسم؛ لأن الحالة النفسية مهمة جدا للاعب. دلوقتي أنت راكب الجدول وكسبان نادي الزمالك، نفسياً الأمور هتبقى أحسن في تمارين الفترة اللي جاية، فالوضع كله بيتغير وبيتحسن، والأمور بتهدى. النهارده أنت هتنزل الشارع غير إمبارح، الموضوع مختلف تماماً، وأتمنى إننا نستغل الجزء ده في الماتشات اللي جاية، مفيش وقت إننا نهدره في حاجات ملهاش لازمة، فإحنا ناخد الدفعة دي وربنا يكرمنا بالماتشات اللي جاية وتبقى الأمور مستقرة. ظهور أشرف داري بالمستوى ده بعد غياب فترة طويلة، الماتش اللي فات لعب والنهارده بيلعب، هل كان مفاجأة؟ لا، كنت بتكلم مع رضا على أشرف داري، هو لاعب كويس بس مشكلته كانت في الإصابات الكتيرة، وأتمنى أشرف داري يلعب 4 أو 5 ماتشات ورا بعض بدون إصابات، العجلة هتمشي معاه؛ لأنه سرد باك كويس. إحنا جايبين أشرف داري من المنتخب المغربي ولعب في كاس العالم، وعشان كده جبناه. هو لاعب كويس، وأتمنى الأمور تمشي معاه كويس لأنه هينفعك مع ياسر وياسين مرعي وهادي رياض. أنت محتاج سردباكات كويسة، ورغم كده أتمنى من عموته إنه يلعب بثلاثة سردباكات طالما مفيش أطراف بتعمل هجمات كتير غير محمد هاني، وعندك الطرف الشمال توفيق محمد بدأ يبقى كويس، لكن استغل الطفرة اللي عندك قدام؛ إحنا عندنا لاعيبة قدام كتير وكويسين، ممكن أستغلهم تكتيكياً في أماكن تنفعني، بما فيهم مروان عطية وأشرف بن شرقي وزيزو وإمام وقفشة. بخصوص مشكلة خط الظهر في الماتشات اللي قبل كده وليه النهارده مكنش فيه مشكلة؟ علشان النهارده اتنين مساكين، واتنين في نص الملعب (سته) لعبوا كده وأكرم توفيق، فالدفاع مكنش مستباح والناس مكنتش بتروح على طول. حسين عموته بدأ يحط إيده على الأوراق وعلى اللعيبه ومستوياتهم، النهارده لما يرجع أشرف داري، ولما يغير طريقة اللعب وحاطط اتنين ستة في نص الملعب، ولما يحط زيزو ناحية اليمين في مكانه. حسين الشحات النهارده خد مساحة قليلة لكن هو مقتنع بيه وهيديله مساحة أكبر الماتشات اللي جاية. أول ما شفت التشكيل قلت خلاص الأمور تمام. قصة حسين الشحات؛ اللاعبين المهارية مابتحبش التمرين أوي، أو مبيبقاش فيه باور عالي زي مروان أو أكرم، فممكن المدرب يحس إنه مش جاهز، لكن حسين في الماتشات بيدي بشكل كويس جدا. الفرق الكبيرة لا تقاس بالتداريب هي تقاس بالماتشات، ولازم يعرف عموته إن فيه لاعيبة طول عمرها بتاع مباريات ولاعبية بتاع تمرين. بخصوص مصطفى شوبير، هو رجل المباراة مع محمد هاني، صدة المباراة وهو متقدمين 1-0. فرصة خطرة لنادي الزمالك والمسافة قصيرة، رد فعله وتوقعه كان سريع، كان ممكن يحول المباراة للتعادل وتتصعب عليك. حراس النادي الأهلي بيبقوا مظلومين؛ الناس فاكرة إن الهجمات عليهم قليلة، لكن الكورة ولا اتنين اللي بييجوا في الماتش بيبقوا أصعب من مباريات الحراس التانيين، لأن هو مطالب يبقى عنده يقظة طول الماتش. النهارده شوبير تصديه للكورة دي كان سبب في الثلاث نقاط. ما أجمل إن عندك أفضل ثلاث حراس في مصر: الشناوي، شوبير، وحمزة علاء. النادي الأهلي مفيش عنده مشكلة في حراسة المرمى. بالنسبة لجدول الترتيب، الأهلي في الصدارة برصيد 16 نقطة، بيراميدز 15 نقطة من 5 ماتشات، والزمالك 13 نقطة من 6 مباريات. الأهلي فاز في خمس مباريات وتعادل في واحدة، ومعدل تهديفي 11 هدف، ودخل مرماه 3 أهداف فقط. أنت كأهلي بتحط ضغوط على كل المنافسين. تغييرات النهارده كانت كلها موفقة، حتى لو بننزل حسين بدري أو متأخر، وجهات نظر المدير الفني تحترم طالما النتيجة في صالح الفرقة. بخصوص بطولة الرابطة، حسين عموته ماريحش اللعيبه بتاعته، كان اختيار صحيح عشان يجهزهم لمباراة القمة، زي توفيق محمد وأشرف داري وسفيان. النادي الأهلي بيمتلك عدد لاعيبة كتير، وممكن يكون الرابطة مفيدة ليه، بدل ما يلعب مباريات ودية، ممكن يلعبها مع الرابطة ويجهز اللعيبه. تخيل لو أشرف داري أو توفيق محمد ما لعبوش الرابطة، ما كانوا هيلعبوا في القمة. فاستغل البطوله دي والعبها بجد هتقدر تستفاد أكتر.