القمة 133.. تعليق حسام عاشور وأسامة عرابي على أداء الأهلي في مواجهة الزمالك وتقييمهم لأداء عموتة في الديربي

وصف الفيديو

محتوى حوار الفيديو: الماتش ده كان توقيته مظبوط بالنسبة لنا قبل الديربي وقبل التوقف وقبل مباراة المنتخب، وبعدين راجعين أول مباراة على طول على الزمالك، كان في شكوك والخصم عمال يقول أنا كسبان وبدي وشغال كويس والأهلي بيتعثر شوية بيكسب بصعوبة شوية، فإحنا داخلين بعدها على مباراة الزمالك هل ده كان التوقيت الأمثل لمباراة الزمالك بالنسبة لفرقة الأهلي وهل النهارده تبقى محتاج لمباراة زي مباراة الديربي دي عشان ترجع لك ثقتك في نفسك مرة ثانية؟ أكيد طبعاً، الماتش ده كان أول ماتش للمدرب حسين عموتة كان لازم يبقى فيه مكسب دي أهم حاجة كانت بالنسبة له وده اللي اشتغل عليه، لكن أنا بتكلم هنا على شخصية النادي الأهلي، كان فيه توقف وناس كانت في المنتخب وراجعين ممكن يبقى عندك إجهاد، لكن عندك لعيبة ثانية، الفرقة كلها اكتملت وموجودة وممكن أي حد يلعب، والنهارده شفنا شخصية النادي الأهلي، شفنا الشوط الأولاني من أحسن الأشواط اللي اتعملت الفترة اللي فاتت، لعيبة كان عندها شخصية وإرادة وحلول حتى في الملعب. كنا بنلعب 4-3-3، وأنا بقول لعموتة كان لازم يلعب باثنين ديفندرين، والنهاردة عملها، وشايف أحسن اثنين كانوا أكرم توفيق ومروان عطية، وكانوا كويسين جداً، وشفنا عموتة حتى التغييرات كلها بشكل هجومي، ليه؟ عشان عندك اثنين ديفندرين واقفين كويس فممكن تلعب في الحتة اللي قدام دي عادي جداً، يعني طلعت الأربعة اللي قدام ونزلت أربعة غيرهم فإنت عشان عندك الأربعة اللي ورا واقفين كويس والاثنين الديفندرين واقفين صح، فده اللي شفناه النهارده. كنت قاعد مع جماعة أصحابي حوالي 8، وكان معانا هاني رمزي وشريف عبد الفضيل وهيثم عبد العظيم وشريف المنسي وعمر خفاجة وهشام لبيب وعلي أبو النصر، هشام وعلي زملكاوية والباقي أهلاوية، وإحنا قاعدين بنقول الأهلي هيكسب من قبل الماتش، الأهلي دايماً بيخلق لنا تحدي كبير وبيخليك واثق ثقة كبيرة جداً إنك مهما كانت الظروف إنت موجود وممكن تكسب في أصعب الظروف، ده طبيعي وإحنا مرينا ببطولات دوري خدناها في آخر لحظة وبطولات أفريقية في الثانية الأخيرة، فده سمة في النادي الأهلي، عندك ثقة تملي إنك هتكسب، وحتى الجمهور بيبقى قاعد والدقيقة 95 وناقص 30 ثانية ويقول لك هنكسب. بالنسبة لعموتة والتشكيل، الحالة اللي موجودة مثلاً في قلب الدفاع كان ياسر إبراهيم مصاب، فكان طبيعي إنه رجع ياسين مرعي وأشرف داري، وكانت المفاضلة بين أشرف داري وهادي رياض، بس هو يمكن أدى لأشرف رغم إنه بقاله فترة طويلة بس كان في الموعد، وعشان كمان كان كويس الماتش اللي فات، وكمل في الباك ليفت محمد هاني، كان في مقارنة مع كريم فؤاد لكن أدى بشكل كويس، واختياره لأكرم توفيق كان أكثر من ممتاز، لأن أكرم عنده كمية جري عالية وروح عالية جداً، كنت محتاج ده في نص الملعب عشان يساعد مروان وتفرغ بن شرقي وإمام وزيزو وسفيان للهجوم، وفعلاً أكرم النهارده من نجوم اللقاء. أدي لعموتة النهارده 7.5 أو 8 من 10، وده رقم كبير، هو أدار اللقاء بشكل كويس وعمل أقصى حاجة في الظروف المتاحة، ومحمد هاني كان من نجوم اللقاء وأخد رجل المباراة، حتى قبل الجون كان متحرك وملك الجبهة اليمين هجومياً ودفاعياً، وجاب جون كويس، حسين عموتة أدار المباراة بشكل كويس، هي حاجة وحيدة بس كنت أتمناها، كنت نفسي حسين الشحات ينزل بدري شوية، كلنا والله، لأننا كلنا بنحب حسين وستايله حلو وموفق في ماتشات الزمالك، وبعدين الماتش اللي فات جايب جونين فالدنيا كويسة.