القمة 133.. كريم شحاتة يفتح النار على الحكم الأجنبي وعصام عبد الفتاح والحكام المصريين أحسن منه

وصف الفيديو

نادي الزمالك امبارح بعد المباراه بالليل متأخر بعت شكوى لاتحاد الكوره في طاقم التحكيم السلوفيني اللي حكم مباراه امبارح. كان امبارح طبعا تابعنا مباراه الزمالك والاهلي وبصراحة انتم عارفين يعني احنا دايما هنا بنقول يعني الطاقم مستواه يرقى، الحكام المصريين افضل بكتير. طاقم سيء جدا امبارح وكان سيبك بقى من ان هو ما حسبش ضربتين جزاء للزمالك لا انا بتكلم على المستوى الفني لطاقم التحكيم. يعني هتلاقي اللياقة البدنية للحكم تعبانه جدا، الراجل في كل الكور او معظم الهجمات للفرقتين بعيد تماما عن منطقة اللعب، يعني ما تشوف كده التمركز بتاعه بعيد جدا، بعيد جدا ما بيقربش من الهجمه. ثانيا ان في كور كتير ده بالنسبة لحكم المباراة هو طبعا تخين شويه واللياقته البدنية تعبانه جدا وفي ناس قالت ان هو كان مصاب مش قادر يجري امبارح. والحاجة الثانية بقى غير حكم المباراه فين المساعدين؟ يعني المساعدين بتوع الحكم سواء المساعدين اللي في الملعب او طاقم الفار في غيبوبه، في غيبوبه في كور كتير امبارح فيها شك وفي كور كتير اتكلمنا فيها امبارح بعيدا انا ما بتكلمش عن مستوى الفرقتين، الاهلي كسب ب 2-0 الف مبروك والزمالك هارد لاك الخساره. لكن بنتكلم يعني اتحاد الكوره او لجنة الحكام كابتن عصام عبد الفتاح طبعا انتم عارفين احنا دايما انا بقول الكلام ده دايما ان احنا بنحاول نبقى مساندين للجنة الحكام وعايزين لجنة الحكام تنجح. ان احنا كنا دايما بنشتكي من الاجنبي اللي بيقود لجنة الحكام عايزين مصري، وكابتن عصام شخصية محترمة جدا وشخصية جميلة وحكم دولي سابق وفي في اللجنة يعني حكام كبار جدا زي كابتن جمال الغندور، يعني لجنة حكام مصرية احنا عايزين المصري ينجح ولكن امبارح بصراحه لا يا كابتن عصام طاقم تحكيم سيء جدا لا يرتقي ان هو يحكم مباراة قمة في مصر، الزمالك واهلي، اهلي وزمالك بصراحه اخطاء كتير، اخطاء مؤثرة، عدم تمركز جيد لحكم الساحة، ما فيش تعاون خالص من حكام الفار، مش عارف حكام الفار فين في كذا كورة امبارح. انا حتى كان عشان ما بقاش انا بتكلم في التحكيم احنا بنفهم كوره وبنفهم تحكيم وبنفهم في القانون بس يعني بنجيب الناس المتخصصة، اللي امبارح كان معايا كابتن محمد عادل قال لي لا الزمالك ليه ضربة جزاء اللي هي الكوره بتاعه مروان عطية وشيكو بانزا. حتى النهارده شفنا الكوره لو زملائي في الاخراج شفنا الكوره من الزاوية العكسية، الزاوية اللي هي ناحيه في ظهر شيكو بانزا ومروان عطية، كان في نفس الكوره بالظبط نفس الكوره بالظبط في بداية الدوري ماتش الاهلي وانبي والشرقية. اهي دي بصوا ايد مروان عطية اهو، بصوا الزقة اهي، كوره كانت فوق دماغ شيكو بانزا، الزقة دي بتاعة مروان عطية زق ضهر شيكو بانزا وسابه خلى شيكو بانزا ما يوصلش للكوره ويفقد توازنه. دي الكوره بتاعة امبارح واضحة جدا، واضحة جدا حتى لما شفتها في التلفزيون واضحة جدا، النتيجة كانت 1-0 ساعتها لصالح الاهلي، كانت ممكن الكوره دي لو اتحسبت، انا انا قلت حتى ايه الفار هيقول الحكم تعال شوفها مثلا او يبقى في ما فيش ما فيش تدخل خالص. حتى الكرة الثانية بتاعة اشرف داري وشيكو بانزا برده انا بقول ضربة جزاء، في بعض الحكام قالوا ضربة جزاء والبعض الآخر قال لك لا دي بس اللي ضربة جزاء بتاعة شيكو بانزا. ف يعني كابتن عصام عبد الفتاح لازم لما بنيجي نجيب حكام اجانب يحكموا ماتش اهلي وزمالك او يحكموا ماتش اهلي وبيراميدز لازم يبقى طاقم تحكيم على مستوى، مش بقول لك طاقم تحكيم من انجلترا او اللي هو اعلى حاجه لا بس يكون طاقم تحكيم انت تبقى عارف مين الاسم اللي جاي يحكم ماتش الزمالك والاهلي. يعني قريت تصريح لكابتن عصام بيقول لك ما تحاسبونيش على الحكم الاجنبي، امال نحاسب مين؟ امال مين اللي يتحاسب؟ ما هو انتوا اللي جبتوا الحكم الاجنبي. كابتن عصام بيقول لك انا خاطبنا الاتحادات ومش عارف ايه وهم دول اللي وافقوا، طب ما احنا ماشي نحاسب مين وحضرتك رئيس لجنة الحكام؟ ودايما ماتشات اهلي وزمالك عايزين حكام كويسين، عايزين حكام يبقى في عدالة، يبقى حكم حتى فنيا جيد، ما هو ممكن الحكم يبقى مستواه سيء زي ما شفنا امبارح طاقم كله في غيبوبة امبارح، طاقم الفار مش عارف نحاسب مين. وانا بطالب كابتن عصام عبد الفتاح احنا عايزين نعرف رايك وفي الحالات بتاعة امبارح، يعني حضرتك معودنا كل اسبوع في بطولة الدوري بيبقى في فيديو لجنة الحكام بتطلع فيديو عشان تشرح الحالات التحكيمية اللي عليها جدل. ف عايزين شوف قال لك ان لا اصل دول الحكام مش مصريين فانا مش هحلل، انا مش مسؤول عن الحكم الاجنبي، لا حضرتك رئيس لجنة الحكام وحضرتك اللي جبته الحكم ده، لجنة الحكام اللي جابت الطاقم التحكيم ده. لا عايزين نعرف رايك في الحالات التحكيمية او راي اللي هيطلع يتكلم من في الفيديو من لجنة، يعني كابتن جمال غندور قبل كده طلع، كابتن عصام عبد الفتاح طلع، اعتقد كابتن سمير عثمان طلع وانا سامع ان كابتن سمير عثمان عايز يستقيل من اللجنة، وكان قبليه كابتن محمود عاشور برده استقال من لجنة الحكام. فلا عايزين نعرف رايك في مستوى الحكم، حضرتك كرئيس لجنة حكام وعايزين نعرف رايك في الكور اللي عليها جدل امبارح عشان ترد على الجماهير دي، نبقى عارفين على فكره مش عيب ان انت تطلع تقول لا الحكم اخطأ، ما هو الحكم ده بشر زيه زي اللعيب زي المدرب، ما فيهاش حاجة خالص يعني عادي جدا بس احنا هنا ما بنقولش مين يعني دايما بتيجي عند الحكم ونخبي ونداري وما نقولش الحكم ده غلط وما غلطش والكلام ده. فانا بطالب كابتن عصام عبد الفتاح كلام اهو صريح ان هو لا انت اي طاقم تحكيم بيجي يحكم مباراة كبيرة زي الزمالك والاهلي، الاهلي وبيراميدز، الماتشات اللي احنا بنجيب فيها حكام اجانب لا لازم تبقى عارف مين اللي جاي ولازم تبقى عارف الاسم اللي جاي او جيب حكم عربي. حكم عربي يكون كويس لو ما عرفش تجيب طاقم تحكيم اوروبي، طاقم عربي اسم كبير حكم كبير عشان نبقى في عدالة ونبقى عارفين مين اللي بيحكم اهلي وزمالك. ثانيا عايزين نعرف راي حضرتك في الحالات التحكيمية اللي حصلت في مباراة الاهلي والزمالك امبارح عشان نبقى عارفين برده القصة، اهو ده ده الطاقم التحكيم بتاع امبارح. بصراحه يعني بصراحة طاقم التحكيم سيء جدا مش انا اللي بقول كمان، يعني اي حكم هتساله امبارح كان معاك كابتن محمد عادل، سمعت كابتن ياسر عبد الرؤوف، سمعت يعني حكام كتير امبارح يعني بيقيموا أداء الحكم، لا قاللك حكم ضعيف جدا لا يرتقي ان هو حكم مباراة اهلي وزمالك ماشي.